17 & 18 Augustus 2006 – BONNIEVALE & RIVERSDAL

17 & 18 Augustus 2006

Al ooit gewonder oor familie? Daai deel van die mensdom wat jy bly is dat hulle nie vreemdes is nie, want dan wou jy helfte van hulle dalk nie geken het nie? Well, speel net …. Miskien! Ek het besluit om te gaan kyk waar ‘n groot deel van die Steyns se voorouers in die 1700’s gebly het – is nog nie seker of ek van hulle afstam nie, maar is naby genoeg. Soos ek nou-die-dag gese het, was een van vanmelewe se Steyns, Hermanus Steyn, vir ‘n kortstondige tydperk die President van die Swellendamse Republiek. Maar in daardie tyd was daar al die Steyns van Voorhuis, die Steyns van Kliprivier en nog ‘n deel of wat.

Ek het gisteroggend die Skerpioen se bullbar in die rigting van Bonnievale gedraai en op die spore van die familie se waens probeer terugry. Toe ek by die hoeveelste Kliprivier en Voorhuis van die hoeveelste Steyn aanry, het ek besef dat dit ‘n week of langer sal vat om dit ordentlik te doen. Was egter interresant om van die mense te ontmoet en met hulle te gesels – soos die mieliepryse ‘n duwweltjie in die skoen is op die Hoëveld, so is die canola pryse ‘n duwweltjie in die Overbergse skoen, maar duwweltjies – die kry jy oral!

So tussen die pragtige Langeberge se voetheuwels en waterstrome heen, met die geel canola lande en die groen koring, het ek die plase nagery en by interresante plekke aangekom – onder andere een van die oorspronklike plaashuise op Voorhuis – die ander is blykbaar al lank reeds afgebreek. By Janharms se Gat is van die opstalle en geboue waar Hermanus Steyn na sy segetog weer gaan boer het nog te sien asook die gerestoreerde huis op Marlouw wat nou ‘n vyfster gasteplaas / gastehuis …. of iets … is. Daar is dit diep deftig en baie mooi – mens kan daar baie weelderig rus – het nie die prys gevra nie, was nie in die gemoedstemming vir skokke nie!


Opgesteyn, is ek verder na Bonnievale toe waar ek by Tim Jan wyn en nog ‘n bietjie wyn gekoop het – vir die wis en die onwis. Daar is wyn van ten minste 20+ landgoede te koop – ken nie een van hulle nie – elke bottel gaan ‘n verrassing wees! Daarna langsaan by Parmelat kaas gaan koop – nie eintlik goedkoper as die Pick & Pay in Pretoria nie, die naamlose kaas is wel goedkoper – blykbaar gemaak van volstruis melk! Hoor dis so ‘n nuwigheid! Daarna deur die dorpie gery – baie mooi met die erwe en winkels wat so aaneen loop met die wingerde – baie soos Keimoes – daar in die Noord Kaap. Het daar by ‘n koffiekroeg wat so amper binne-in ‘n wingerd staan, die lekkerste ommelet en chips in ‘n laaaang tyd geeet!

So met die terugry Swellendam toe die middag, het ek weer die wonderlike natuurskoon van die anderkant af beskou – daardie blou ruwe berge met die klowe en geplooide vorheuwels het ‘n baie blywende indruk by my gelaat, en ek het gewonder hoe my voorouers uit die deel van die land weggetrek het? En dan hoef ek net te dink aan ons ontstokengeit met vandag se regering om te besef dat hulle toe al gesukkel hetmet onkapabele en korrupte amptenary. Verskil is net ons nie meer vandag kan of wil wegtrek nie – die land is ons land – 354 jaar lank! Toe was die ou klomp nog soort van Europeërs – nou is ons Afrikane, en ons is hier om te bly! Jammer vir die seepkissie toespraak, maar ek kan so g..vol raak as ons Afrikaners onsself nog as Europeërs beskou – dit is van sulke beskouinge dat die Swart Afrikane dink ons hoort nie hier nie!

Laatmiddag het ek in Swellendam aangekom en bietjie die dorp te voet gaan verken. Met al sy tientalle gastehuise - party ook eetplekke, en die restaurante, was die dorp stil – ek wonder hoe oorleef al daardie plekke wat toeriste en reisigers as brood en botter het? Het gewens ek kon so van die een restaurant tot die volgende eet sodat hulle darem besigheid kon kry! Dit is regtig ‘n dorp wat ingestel is op toerisme – van voor tot agter.

Die volgende oggend het ek rustig die karavaan gehak en net voor ek wou ry, toe kom daar ‘n karavaner en sy vrou (karavaan ook) wat 2 dae vantevore af is Agulhas toe, daar aan. Die wind het hulle tan blykbaar die vorige nag skoon weggewaai daar by Agulhas – hulle was nog redelik wit om die kiewe – en hulle het genoeg gehad van een nag se klou om op die bed te bly! Na diep simpatisering en nabetragting oor die weer vorentoe en die voor en nadele van verskeie dorpe kus af, is ek daar weg – Tergniet toe.

So met die N2 ooswaarts is dit moeilik om kort – kort te stop, maar die wêreld is mooi, en noodgedwonge moes ek menigmaal die karavaan op die kant van die pad balanseer terwyl ek eers gou ‘n foto neem. Daar deur Heidelberg – het ek darem verlang na hierdie Heidelberg se beeldskone naamgenoot van die Transvaal! Daardie Suikerbosrandse Heidelberg is darem diepmooi vergeleke met hierdie Kaapse klong! Gelukkig was daar redelik diesel in die Skerpioen en ek hoef toe nie onnnodig spoed te verminder nie. So is ek toe deur na Riversdale toe.

Op Riversdal is ek by Coralie aan by haar Eden Bed & Ontbyt en het baie lekker daar gekuier. Sy het ‘n baie mooi en gesellige B&B daar – en ek het al ‘n paar van hulle in my se omswerwings gesien! Na ‘n lekker middagete het hulle my Riversdal se Sleeping Beaty gaan wys – en ja, selfs ek, met my beperkte insig, kon die slapende skoonheid rustig op die berg sien lê. Die kleintjie aan die ander kant ook, maar daar moes ek bietjie dieper in die verbeelding delf.
Laat die middag het ek Mosselbaai verbygegaan. Ook nie meer vinnig daardeur nie, dit is deesdae ‘n groot dorp in sy eie reg met baie ontwikkelings en nywerhede. Daardeur, verby Hartenbos en afgedraai daar by Groot Brak Rivier – of soos hulle hierlangs sê, Great Brak River – hoekom dan nie maar Great Dog River nie? Engelse, Engelse, Engelse!! Vanmelewe al ‘n probleem – blykbaar niks verander nie!

‘n Koppie tee in die hand later het ek op Anton & Annemarie’hulle se stoep oor die see uitgekyk in Tergniet. Jy kan van Mosselbaai in die weste sien tot daar êrens oos langs die kus af. Die walvisse blaas en waai stert, maar kom met ‘n kamera nader – dan vreet hulle gras op die bodem! Ek gaan bietjie hier by Anton’hulle uitspan tot na die naweek voor ek weer die swerfpad verder vat.